Umsunguli we-Ingaloyomthemtho, uMnumzane uBhekinkosi Thulani Nkosi ongummeli wezomthetho, wabona kunesidingo esikhulu kubantu ukuba bathole ulwazi oluphelele lwezomthetho oluphathelene nanoma yimuphi umkhakha ukuze bakwazi ukwenza izinqumo eziphusile kanye nokuthatha izinyathelo ezifanele uma kunodaba oluthinta umthetho.

UKUNTULEKA NEZIHIBE EKUFINYELELENI KOKUQUKETHWE YIMITHETHO YEZWE

Imithetho yethu yalapha eNingizimu Afrika ibhalwe ngolimi lwesiNgisi futhi kusetshenziswa lona kakhulu ezinkantolo zakuleli.

Imbalwa imithetho ehunyushelwe ezilimini zethu zabomdabu. Okumangaza kakhulu wukuthi yize ummeli engowomdabu exoxisana neklayenti yomdabu uncika kakhulu olimini lwesiNgisi okudala ukuthi loyo oyiklayenti angalutholi kahle ulwazi oluphelele asuke elulangazelela.

Yingenxa yaleso sizathu esenze ukuba Ingaloyomthetho isungule okwamanje isigcawu sabantu abakhuluma izilimi zabeNguni ukuze bakwazi ukufinyelela emithethweni yalapha eNingizimu Afrika ethinta impilo yabo yansuku zonke. Ingaloyomthetho iphokophele ukuba ibe nezigcawu ezinhlobonhlobo ukuze noma ubani aluthole ulwazi.

UMQONDO WOKUBUMBA INGALOYOMTHETHO

Sikholelwa ukuthi umuntu uluthola kahle ulwazi uma lulethwa ngolimi lwakhe lwebele. Ulwazi lunika umuntu amandla okuthi akwazi ukwenza isinqumo esiphusile. Ngakho-ke isiqubulo sethu sithi “Thola ulwazi lwezomthetho ngolimi lwakho ukuze ukwazi ukuthatha isinqumo esifanele, uvikele amalungelo akho”.